Nakaplagang patay na

Local News
Local News

Unang gitaho sa pamilya nga missing ang usa ka amahan ug gi-post sa social media, kini nakaplagan nga wa nay kinabuhi sulod sa iyang awto sa basement parking 1 sa Jesa Building sa Barangay Cogon Ramos, dakbayan sa Sugbo, alas 2 sa hapon sa Dominggo, Nobiyembre 12, 2023.

Human sa panawagan, du­nay nakahatag og taho sa kapulisan sa nahimutangan ni Fritz Lim, hamtong, propisor sa usa ka inilang unibersidad sa dakbayan sa Sugbo, taga St. Jude Acres Subdivision, Brgy. Bulacao Pardo, dakbayan sa Sugbo.

Sa Facebook post sa iyang anak nga si Christine Joy, ang iyang amahan wala na makauli sa ilang balay sukad niadtong Biyernes, Nobiyembre 10, 2023.

Dugang sa post sa anak, nabalaka ang iyang pamilya human dili pa kini dugay gioperahan sa kasingkasing ug nagsige pa og inom og tambal.

Matod pa, katapusan kini nga nakit-an nga nitambong og misa sa Basilica Minore del Sto. Niño de Cebu sa alas 12:30 sa udto sa Biyernes.

Si Lim nagmaniho sa iyang Toyota Wigo nga kolor gray, nagsul-ob og blue t-shirt, blue shorts, ug blue nga rubber shoes dihang napalgan nga patay sa sulod sa awto.

Atol ning pagsuwat, ang Superbalita Cebu nagkontak sa pamilya apan wala pa kini mohatag og opisyal nga pamahayag bahin sa kamata­yon niini.

Samtang, nagduda ang ka­pu­lisan nga ang iyang kamatayon dunay kalambigitan sa iyang sakit sa kasingkasing.

Ang kapulisan sa Abellana Police Station sa Cebu City Police Office (CCPO) nga dunay hurisdiskyon sa hitabo, mohimo pa og dugang imbestigasyon sa kamatayon ni Lim.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph