Human sila nakasinati og duha ka sunodsunod nga kapildihan, ang hosts Indiana Pacers bangis nga ningbawos sa Oklahoma City Thunder, 108-91, ning Biyernes, Hunyo 20, 2025 (PH time), sa Game 6 aron tablahon ang National Basketball Association (NBA) Finals series, 3-3.
Ning maong sangka, nakita ang determinasyon sa Pacers nga dili pa sila andam modawat og kapakyasan hilabi na ang usa sa ilang mga lider nga si All-Star guard Tyrese Haliburton.
Sa sayo pa, kuwestiyunable nga makaduwa si Haliburton tungod kay aduna kini angol (strained right calf).
Apan pagsugod sa duwa, naa si Haliburton sa naandan niyang posisyon sa starting unit sa Pacers ug tataw nga nakahatag kini og dugang kadasig sa iyang mga kaubanan.
“If I can walk, then I want to be out there,” matod ni Haliburton nga napatik sa AP News.
Ang Thunder mao unta ang unang nakaarangkada ug nakaposte dayon kini og 10-2 nga labaw sa sayong bahin sa kombati.
Apan dali ra napapas kining maong labaw sa Thunder ug paglabay sa pipila ka mga minutos, nakaposte na ang Pacers og 26-17 nga labaw.
Sa sayong bahin sa 2nd quarter, nakasikit ang Thunder, 33-34, apan human niini, daw katalagman na ang ilang nahiaguman.
Usa ka makabungog nga 36-9 ang gihimo sa Pacers sa nagsunod 12 ka mga minutos nga naghatag kanila og 72-40 nga labaw sa sayong bahin sa 3rd quarter.
Niadtong higayuna, tanang mga magduduwa sa Pacers sulod sa korte adunay kontribusyon sa nagkadaiyang mga departamento.
Wala na nakabangon pagbalik ang Thunder human niini.
“We just wanted to protect home court,” matod ni Haliburton, kinsa usa sa unom ka mga sakop sa Pacers nga ningmugna og dobleng numero nga puntos,
“We didn’t want to see these guys celebrate a championship on our home floor. Backs against the wall and we just responded. ... Total team effort.”
Puntos matag usa:
Indiana (108)- Toppin 20, Nembhard 17, Siakam 16, Haliburton 14, McConnell 12, Nesmith 10, Sheppard 7, Bryant 4, Bradley 3, Truner 3, Mathurin 2.
Oklahoma (91)- Gilgeous-Alexander 21, Jalen Williams 16, Joe 11, Hartenstein 10, Jaylin Williams 7, Wiggins 5, Holmgren 4, Jones 4, Dieng 3, K. Williams 3, Dort 3, Wallace 2, Mitchell 2. / Gikan sa wires