Makonsiderar nga usa si unified bantamweight champion Japanese Junto Nakatani sa posibleng mahimong kandidato alang sa 2025 Fighter of the Year apan ang labing dakong gasa nga iyang gihuwat mao ang makontra ang iyang kababayang superstar nga si Naoya “Monster” Inoue sa sunod tuig.
Si Nakatani, kinsa adunay 31-0, 24KOs nga rekord, kaduha niaway ning tuiga diin pulos wala nakahuman ang iyang mga kontra.
Sa labing ulahi niyang away niadtong Hunyo 8, giparetiro ni Nakatani sa 6th round ang lain niyang kababayan nga si Ryosuke Nishida aron usahon paggunit ang World Boxing Council (WBC) ug International Boxing Federation (IBF) bantamweight titles.
Nagkanayon ang trainer ni Nakatani nga si Rudy Hernandez nga sa dili madugay, mosaka na og timbang ang iyang batos aron kontrahon si Inoue, kinsa maoy unified super bantamweight king.
“My understanding is that there is a possibility that he may be fighting Inoue at the beginning of next year,” matod ni Hernandez nga napatik sa www.boxingscene.com. / ESL