Gikompirmar ni World Boxing Council (WBC) ug International Boxing Federation (IBF) bantamweight king Junto Nakatani nga mosaka na siya sa super bantamweight alang sa iyang tinguha nga mahimong four-division world champion.
Kini nga kalambuan gikataho sa boxingscene.com.
Matod ni Nakatani, kinsa usa sa kasamtangang dekalidad nga mga boksidor sa Japan, nga iyaha na’ng ibakante ang iyang bantamweight world titles ug mokampanya na siya sa super bantamweight sugod sa sunod niyang tahas.
Si Nakatani, kinsa adunay impresibong 31-0, 24KOs nga rekord, nakabaton sab og world titles sa flyweight ug junior bantamweight.
Adunay dakong plano nga iparang si Nakatani sa iyang kababayang si super bantamweight undisputed champion Naoya “Monster” Inoue, kinsa adunay 30-0, 27 KOs nga rekord.
Hinuon gilaumang makigkontra pa si Nakatani og laing boksidor sa super bantamweight una kini makigkontra ni Inoue. / ESL