Tulo ka mga tawo ang nangamatay tungod sa pagpakigpinusilay tali sa mga polis sa managlahing mga dapit sa Metro Cebu.
Sa lungsod sa Consolacion, napatay sa ningresponde nga mga polis sa managlahi nga hugna ang duha ka mga suspek nga ilang gialarmahan kay nakigpinusilay sa ilang gikabangi, nga matod pa, sa transaksyon sa ilegal nga drugas.
Sa Lunes sa alas 4:45 sa hapon, Hulyo 15, 2024 sa Sityo Mapo, Brgy. Garing, Lungsod sa Consolacion, nahitabo ang unang engkwentro.
Si Police Lt. Col. Ruel Burlat, hepe sa Consolacion Police Station nga nahinabi sa Superbalita Cebu, niila sa mga suspek nga sila si Vincent Diaz Yap, 27, taga Brgy. Pulpogan, Consolacion ug ang kauban niini nga si Rudy Capangpangan Jr., alias “Botyok.”
Nasayran nga sila si Yap ug Capangpangan adunay gikaengkuwentro nga si Florencio Ermac Salde, 35, taga Sitio Mapo, Brgy Garing.
Nalisang ang mga silingan sa dihang ning-abot sa nahisgutang lugar sila si Yap ug Capangpangan ug nagkabangi tali kang Salde nga giingong nagsiningkahay nga niresulta sa pinusilay.
Nanawag og police assistance ang mga lumolupyo hinungdan nga ningresponde ang mga sakop sa Consolacion police, apan gipamusil sab sila sa dihang ilang nasugatan sila si Yap ug Capangpangan nga sakay sa motorsiklo.
Si Yap armado og KG9 submachine pistol samtang si Capangpangan adunay .45 kalibre nga pistola.
ENGKUWENTRO
Naigo si Yap ug namatay samtang samaran si Capangpangan nga dali nga nikanaug sa motorsiklo dayon nisibat paingon sa bukid sa maong lungsod.
Samtang si Salde nga adunay samad sa tiil wa na nipalag sa mga polis, nitahan uban sa iyang armas nga AR15 rifle.
Sa Martes sa buntag, Hulyo 16, nakadawat og tawag ang police station, nga ni-report nga adunay tawo nga nagsinggitsinggit sa bukid sa Sityo Mapo ug sa dihang gisusi sa kasilinganan, armado kini.
Saysay ni Burlat nga gihimo ang hot pursuit operation ug natultolan si Capangpangan, kinsa namusil na sab sa responding team.
Apan nalupig ang suspek sa kaabtik sa mga polis, siya naigo ug gideklarar nga dead-on-arrival sa dihang gidala sa tambalanan.
TEJERO
Sa laing bahin, patay ang usa ka lalaki nga gialarma nga armado alas 11:25 sa Lunes sa gabii, Hulyo 15, 2024 sa Sitio Tevil, Brgy. Tejero, Siyudad sa Sugbo, kay nakigpinusilay sa mga polis nga ningresponde.
Giila ang suspek nga si Santiago Yu, alyas Tiago, hingkod, residente sa Sitio Silangan 1, Brgy. Tejero, Cebu City.
Matod ni Police Major John Lynbert Yango, hepe sa Waterfront Police Station, nga sila nakadawat og tawag sa telepono sa alas 9:30 sa gabii nga adunay tawo nga nagdala-dala og armas sa Sitio Silangan 1.
Ang caller nibutyag nga ang nagdala-dala og armas naila lang sa alyas nga Tiago. Tungod ani, dali nga niresponde sa dapit ang upat ka mga police staff sergeant nga sila si Jennefer Pal Torregosa, Jundy Flores, Junrel Dublin ug Mark Anthony Dela Victoria.
Apan pag-abot sa upat, sila gipamusil na hinuon sa suspek, maayo na lang nga way naigo ug nahitabo ang pinusilay.
WA PADAKOP NGA BUHI
Nahitabo ang ginukdanay ug usa sa mga polis ang nakasugat sa suspek habig na sa kapilya, apan abtik kini nga nilusot sa kabalayan sa maong lugar dayon nisaka sa atop sa kabalayan ug niambak sa sapa.
Tungod kay wa na makit-i ang suspek, sila nilusad og laing hot pursuit operation uban sa Special Weapon and Tactics, ilabi na nga adunay nakahatag og impormasyon nga nakit-an si Tiago sa Sitio Tevil nianang pagka-alas 11:25 sa gabii.
Dali nga nibalik ang mga sakop sa Swat sa maong ang lugar ug ila ning naengkwentro human nga namusil na sab.
Siya gibaslan sa mga otoridad hinungdan nga naigo sa tuong bahin sa lawas ug nilapos ang bala sa walang abaga nga niresulta sa iyang kamatayon.
Gibutyag ni Yango nga si Tiago ang suspek sa pagpamusil niadtong Sabado, Hulyo 13, 2024, sa usa sa mga barangay nga sakop sa Waterfront Police Station. Gani ang tawo nga iyang gipusil gihaya pa.
Drugas ang usa sa gitan-aw nga motibo nganong gipusil ni Tiago ang biktima human sila nagkabangi.
Nasayran nga bag-o lang kini nga nakagawas sa Cebu City Jail sa kaso sa ilegal nga drugas ug duna pa siyay laing mga kaso nga pending pa sa korte.
NOTADO
“Mamirahay ni sa ilang lugar sa Tejero. Gani ang akong deputy hapit madisgrasya ani niya sa dihang girespondehan ni siya. Pagkablit sa armas wala lang makabuto kay kon nakabuto man gani to, madisgrasya pud to. Dili ni basta-basta mo surrender kay mosukol gyud ni siya,” matod ni Yango.
Nakuha sa crime scene ang usa ka kalibre .38 nga improvised revolver nga loaded og tulo ka bala sa 9MM ug usa ka coin purse nga dunay sulod nga usa ka pakete sa gituohang shabu. / GPL, AYB, DVG