Patay ang usa ka 31-anyos nga lalaki nga armado human nakigpinusilay sa mga nirespondeng polis niadtong Miyerkules sa gabii, Agusto 5, 2026, sa Sityo Tomoy, Barangay Ibabao, Lungsod sa Cordova.
Giila ang namatay nga si Merson Fernandez Manching, alyas Balot, 31, nga nagpuyo sa Sityo Bankal sa maong barangay.
Nakahimo og operasyon ang Cordova Municipal Police Station human makadawat og tawag gikan sa usa ka concerned citizen bahin sa usa ka armadong tawo nga nagsul-ob og itom nga sleeveless nga kamisadentro ug dirty white nga short pants sa maong dapit.
Dali nga niresponde ang mga sakop sa Cordova Police Station sa pagpangulo ni Police Major John Khalev Sanchez, uban ang mga intelligence personnel.
Pag-abot sa dapit, naatlan sa mga polis ang suspek nga nimay-ong sa deskripsyon sa tawag.
Apan sa pagkabantay niini sa presensya sa kapulisan, dali siyang nidagan pasulod sa usa ka abandunadong balay sa kasagbutan ug namusil.
Nibawos ang kapulisan nga niresulta sa pagkaigo sa suspek.
Dali nga gitawagan sa kapulisan ang Municipal Disaster Risk Reduction and Management Office (MDRRMO) ambulance aron madala ang suspek sa Mactan Doctors Hospital sa Dakbayan sa Lapu-Lapu apan gideklarar siyang dead on arrival sa attending physician.
Nasakmit sa mga sakop sa Scene of the Crime Operation (Soco) gikan sa nahitabuan ang usa ka armas nga wala pa matino ang kalibre, upat ka buhing bala, duha ka sachet sa gidudahang shabu, ug pipila ka drug paraphernalia.
Subay sa gihimong background investigation sa kapulisan, si Balot mao diay ang giilang gunman sa nahitabong pagpamusil niadtong Hulyo 12, 2026, sa Sityo Bankal, Barangay Ibabao diin ang biktima mao si Roberto Senit Tampus, alyas Jojo, 28. / AYB
