Giklaro sa Cebu City United Vendors Association (CCUVA), Maria Pino nga ang makolekta gikan sa mga manindahay sa ‘Chibugan sa Kamagayan’ nga tag-P200 matag adlaw maoy gikuhaan alang sa operational ug maintenance expenses sa maong food strip.
Ang maong makolekta maoy kuhaan sa bayad sa kuryente, honorarium sa mga personnel ug ubang pagpanindot o pagpalambo sa maong lugar.
Gisalikway ni Pino sa dihang nahinabi sa SunStar Cebu pinaagi sa telepono niadtong Biyernes, Agusto 16, 2024, ang pasangil nga ang maong koleksiyon gi-remit sa usa ka partikular nga opisyal sa City Hall.
Kini human nga adunay mga indibidwal nag-post online, nga nagkuwestiyon sa koleksyon sa CCUVA, nga tag P200 nga bayad sa operasyon matag vendor sa Chibugan.
“Sa Lunes kay 40 plus na siya. Kanang Biyernes, Sabado ug Dominggo kay moabot siya og 60 plus walay labot sa mga dry goods (vendors),” matod pa ni Pino.
Sumala pa nga ang CCUVA mokolekta og tag P100 matag adlaw gikan niadtong namaligay og dry goods apan kon mag-uwan dili sila mangolekta ilabi na nga menos ang mga kustomer.
Ang P200 nga bayrunon sa mga manindahay alang sa market ug rental fees kolektahon sa mga personnel sa City Treasurer’s Office ug sa market administration.
Gawas pa, gipahibawo ni Pino nga ang market administration mokolekta sab og inadlaw nga cash ticket gikan sa P30 ngadto sa P60 depende sa gidak-on sa stall.
Iya sab nga gipasabot nga ang nakolekto nga P200 maoy kuhaan aron ibayad sa bill sa kuryente, honorarium ug beautification purposes sa Chibugan.
Ang maong kantidad nasabutan tali sa sa mga manindahay ug vendor’s association. / EHP