Gihatod nga walay panimuot sa Mambaling Police Station ang usa ka wala mailhing lalaki nga gitabangan og kulata sa mga estambay human giingong nangawat og duha ka ligid sa motorsiklo ug sapatos sa Macopas Compound, Barangay Mambaling, Dakbayan sa Sugbo, Lunes sa kaadlawon, Disyembre 9, 2024.
Atol ning pagsuwat, ang suspek wala pa mailahi nga nagsul-ob og pula nga t-shirt, itom nga short pants nga dunay rebite nga puwa ug gisul-ob ang puti nga sapatos nga matod pa iyang kinawat.
Dunay tattoo sa iyang paa ang suspetsado nga BC 45 nga nagpasabot nga gikan na sa sulod sa city jail.
Ang suspek gidala sa Cebu City Medical Center (CCMC) tungod sa grabing bun-og nga nahiaguman. / AYB