Naligo sa beach sa Moalboal, missing

Tulo na ka adlaw nga mis­sing ang usa ka lalaki nga naligo sa public beach sa Sityo Basdaku, Barangay Saavedra, lungsod sa Moalboal hinungdan nga nagtuo ang mga otoridad nga siya nalumos.

Ang gikataho’ng missing giila nga si Alejandro Serad Canene, 58, minyo, taga Barangay Guadalupe, siyudad sa Sugbo.

Sa imbestigasyon sa kapulisan sa Moalboal Police Station ubos sa kamandoan sa ilang hepe nga si P/Capt. Claudio P. Gaku, nasayran nga ang biktima naligo sa dagat kuyog sa iyang pamilya niadtong Sabado, Mayo 11, 2024, apan alas 12:26 sa udto namatikdan sa pamilya nga nawala si Canene hinungdan nga ilang gipangita sa dagat ug baybayon apan pakyas gihapon.

Mao kini hinungdan nga gi-report kini sa anak nga si Geneva Canene ngadto sa kapulisan sa lungsod.

Gilusad ang search and rescue operations sa kapulisan, Philippine Coast Guard, kabumberohan, Bantay Dagat, life guards ug volunteer scuba divers apan wala gihapon igkita hangtod sa pagsuwat ning taho sa Lunes, Mayo 13, 2024.