Nakabsan gyud sa iyang kinabuhi sa Dominggo sa kaadlawon, Mayo 11, 2025, ang batan-ong reporter sa Cebu Daily News Digital human ni mabanggai sa naghaguros nga motorsiklo alas 11:40 sa gabii niadtong Mayo 2, 2025 sa M.C. Briones street corner H. Abellana, Barangay Basak sa dakbayan sa Mandaue.
Si Emmariel Ares, 25, dalaga, lumad nga taga lungsod sa Borbon apan kasamtangan nga nagpuyo sa Barangay Canduman sa maong dakbayan, nakaangkon og fracture sa ulo human malamba sa semento human mabanggai sa Yamaha Aerox nga gimaneho ni Elmar Montecillo Batulan, 28, taga Barangay Nahusan, lungsod sa Sogod.
Sakay sa sakyanan sa laing media network si Emmariel sa iyang pagpauli gikan nga nag-cover sa Maisug rally sa Dakbayan sa Danao.
Pag-abot sa maong lugar, sigun sa iyang inahan, mihapit pa kini sa usa ka convenience store aron mopalit og pagkaon sa iyang manghod nga mograduwar sa kolehiyo karong Sabado, Mayo 17, 2025.
Makita sa CCTV camera nga nagpaabot pa si Emmariel nga mo-stop ang traffic light aron molabang ug sa dihang nag red light na, kalit lang mibangga kaniya ang naghaguros nga motor gikan sa lungsod sa Consolacion nga daw sa nag beating the red light.
Tungod sa kakusog sa dagan sa motor ug impact niini sa lawas sa biktima, nalagpot pa si Emmariel og pipila ka metros.
Dali’ng gitabang ang biktima sa mga tawo nga nakasaksi sa insidente ug nanawag og ambulansya.
Tungod sa dakong kadaot sa ulo ug lawas sa biktima, gipaubos kini sa operasyon apan nakabsan gyud sa iyang kinabuhi human sa siyam ka adlaw.
Una nang gihimakak sa driver nga wala siya mag beating the red light sanglit giingong ang biktima ang kalit lang nga midagan bisan naka go signal pa ang traffic lights.
Bisan pa man niini, mag-atubang og kasong Reckless Imprudence Resulting in Homicide ang atubangon nga kaso sa suspek nga ipasaka sa kabanay sa Martes, Mayo 13, 2025.
Si Emmariel nasulod sa CDN digital niadtong 2023 human migradwar sa University of San Jose-Recoletos diin siya ang gidestino sa pagkuhag balita sa kapulisan ug nahimong sakop sa Defense PNP Press Corps ubos sa umbrella sa Cebu Federation of Beat Journalist.
Nasubo ang iyang mga kauban sa media sanglit ilang gihulagway ang maong biktima nga buotan, alegre nga kauban ug maayo ikatrabaho ug labaw sa tanan wala magpabadlong sa iyang mga kauban sa trabaho. / AYB