Patay ang usa ka Indian national nga backrider sa usa ka motorsiklo nga nahug ug naligsan sa ni-overtake nga Ceres bus sa national highway sa Barangay Langtad, Lungsod sa Argao, alas 3:43 sa hapon, Dominggo, Marso 30, 2025.
Ang biktima nga dead on arrival sa Isidro Kintanar Memorial Hospital (ICKMH) sa Barangay Bogo, Argao giila nga si Kuldip Kumar, 51, nga kasamtangan nga nagpuyo sa Barangay Tulic sa maong lungsod.
Sa imbestigasyon sa Argao Municipal Police Station sa pagpangulo sa hepe niini nga si Police Major Janus Giangan nasuta nga pulos nagsubay sa dalan paingon sa norte ang duha ka motor nga Suzuki nga gimaneho si Suman Surjit, 45, Indian national ug iyang angkas nga si Kumar ug ang Yamaha Aerox nga gimaneho ni Analisa Gonzaga Narbasa, 39.
Samtang nagtupad ang duha ka motor nagtabi usab ang duha ka drayber niini samtang naa sa ilang luyo ang Ceres aircon bus nga dunay plate number GXU 576 nga gimaneho ni Fernando Sarno Malabago Jr., 36, taga Barangay Linuthangan, Canlaon City, Negros Oriental.
Pipila ka gutlo ni-overtake ang Ceres bus sa duha ka motor apan kalit lang nga wala makakontrol sa iyang pagmaneho si Suman Surjit ug dayong katumba samtang ang iyang angkas nga si Kumar nalagpot sa tuong kilid sa bus nga niresulta sa iyang pagkapasok sa ilawom.
Gumikan kay nagdagan pa ang maong bus, naguyod pa ang biktima og mga 40 ka tiil gikan sa iyang pagkalagpot nga miresulta sa dakong kadaot sa iyang lawas.
Dali nga niresponde ang mga personnel sa Municipal Disaster Risk Reduction and Management Office sa Argao ug gidala ang biktima sa tambalanan apan gideklarar kini nga dead on arrival ni Dr. Marcelito Fernandez Jr., ang attending physician sa Isidro Kintanar Memorial Hospital tungod sa hemorrhagic shock.
Matod ni Giangan, kasamtangan nga gibalhog sa custodial facility sa Argao Police Station ang drayber sa Ceres bus alang sa padayon nga gihimong imbestigasyon.
Nagtuo siya nga nakuratan ang drayber sa motor sa dihang kalit lang nga ni-overtake ang bus samtang nagtabi sila ni Narbasa.
Giandam na ang kasong reckless imprudence resulting in homicide, physical injury, ug damage to property batok ni Malabago. / AYB