Namaligya og shabu ‘aron ipaopera’ sa anak nga masuso

GUAM P. LOGROÑO
IPAOPERA KUNO: Si Elvy, 37, i­nahan sa pito ka mga bata, nabilanggo sa Mambaling Police Station sa pagpamaligya og shabu. Siya nangangkon nga nagtigom siya og kwarta aron ipaopera sa iyang anak nga babaye nga masakiton. / GUAM P. LOGROÑO

Usa ka inahan nangangkon nga siya napugos sa pagpa­maligya og shabu aron igasto sa operasyon sa iyang upat pa ka buwan nga anak nga babaye. Ang suspek nasikop sa buy-bust alas 11:40 sa gabii sa Huwebes sa Sitio Naba, Brgy. Mambaling, Cebu City.

Ang inahan nga gitago sa alyas Elvy, 37, dunay kapuyo, nagpuyo sa nahisgutang lugar, nasikop sa mga sakop Drug Enforcement Unit (DEU) sa Mambaling Police Station sa Cebu City Police Office (CCPO).

Si Major John Lynbert Yango, hepe sa Mambaling Police Station, niingon nga si Elvy naa sa ilang listahan sa street level individual (SLI).

Ila ning gipalitan og usa ka paketi’ng shabu nga balor og P200 ug dihang nasikop, siya nakuha­an og laing 12 ka pakite ug usa ka medium size nga bulto.

Ang drugas motimbang og singko gramos nga mobalor og P34,000.

Ang suspek nagsulod gawas sa bilanggoan tungod sa kasong illegal drugs.

Si Elvy, nga nahinabi sa Superbalita Cebu, nagkanayon nga tungod kay nasakit iyang anak, siya napugos sa pagpamaligya og drugas.

“Akong anak upat ka bulang babaye operahanan sa kasingkasing. Unya wala man koy ikabayad mao nga namaligya ko,” dugang ni Elvy.

Eskedyul unta ang operation sa kasingkasing niadtong Abril 1, 2024 apan tungod kay wala siyay kwarta, kini nalangay.

Ang iyang unang kapuyo nabilanggo tungod sa ilegal nga drugas ug unom ka tuig na nga wala makagawas. Duna silay unom ka mga anak.

Ang ikapito nga anak nga batang babaye iyang anak sa iya karon nga kapuyo nga napriso sab sa illegal drugs.

Kay wala siyay madangpan, namarok siya nga iya sang kuhaan og portion.

Gibaligya sab niya nga na­abot og P4,500.

“Namasin ko nga motubo pa akong kita sa shabu.Kay gamiton nya pagpa-opera sa akong anak,” sumala ni Elvy.

Sagad sa iyang kustomer mga higalang babaye nga nagtrabaho sa bar. / GPL

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph