USA ka tinun-an nga giingong namaligyag illegal nga drugas aron ibayad sa tuition ang napusasan atol sa buy bust nga gipahigayon sa hiniusang pwersa sa kapulisan ug sa mga ahente sa Philippine Drug Enforcement Agency (PDEA 7) sa alas 6:55 sa gabii sa Dominggo, Pebrero 10, 2025, sa Purok 1, Brgy. Triumfo, lungsod sa Carmen, Sugbo.
Ang suspek nga si alyas Allan, 21, ulitawo, taga Sityo Cogon, Barangay Maslog, Danao City, nasakmitan og 213 gramos sa giingong shabu nga mobalor sa P1.4 milyones ka pesos.
Si Allan usa ka 1st year college student nga nagtungha sa kursong Information Technology.
Gihulagway ni Police Captain Jessie Tañola, hepe sa Carmen Police Station nga maoy nangulo sa operasyon, si Allan nga usa ka high value individual.
Siya nagkanayon nga usa ka semana nilang gi-monitor si Allan human sila nakadawat og impormasyon mahitungod sa iyang illegal nga kalihukan. / GPL, DVG