Usa ka 25-anyos nga tinun-an sa Philippine College of Criminology (PCCR) namatay tungod sa giingong hazing.
Sa report sa kapulisan, ang biktima giila nga si Aldryn Leary Bravante, residente sa Imus, Cavite.
Ang giingong hazing nga gihimo isip kabahin sa initiation rites sa Tau Gamma Phi fraternity nahitabo niadtong Oktubre 16, 2023 sa usa ka abandonadong building sa Sto. Domingo sa Quezon City.
Nasikop ang duha ka mga suspek nga giilang sila si Justin Artatez ug Kyle Michael Ordeta, pulos mga tinun-an sa third year sa PCCR.
Si Bravante daling gidala sa mga suspek sa tambalanan human kini nawad-an sa panimuot subay sa initiation rites.
Gideklarar siya nga dead on arrival. Ang biktima nakaangkon og mga samad sa nagkadaiyang parte sa lawas ug grabeng bun-og sa likod nga bahin sa iyang paa nga daw tungod sa paghapak sa bugsay.
Niadtong Marso, ang estudyante sa Adamson University nga si John Matthew Salilig namatay tungod sa hazing-related injuries atol sa initiation rites sa Tau Gamma Phi sa Laguna. (SunStar Philippines)