Usa sa mga batan-on ang namatay human sa lima ka adlaw sa dihang sila nakilatan samtang nagduwa og soccer sa hawanan sa Sityo Danawan, Barangay Liburon, Dakbayan sa Carcar, niadtong Oktubre 11, 2024.
Ang 16-anyos nga tinun-an sa Grade 10 nga si Lemuel Alfeche, taga-Sityo Kalindoy sa Barangay Liburon, Siyudad sa Carcar, nakabsan sa iyang kinabuhi sa Vicente Sotto Memorial Medical Center niadtong kaadlawon sa Miyerkules, Oktubre 16.
Kini maoy gikonpirmar sa maguwang sa namatay nga si Macky Alfeche sa dihang nahinabi sa Superbalita Cebu.
Nasayran nga nakaangkon og grabe’ng paso si Lemuel gani milagom ang iyang liog.
Kahinumduman nga si Alfeche ug laing batan-on nga tinun-an sab sa Grade 10 ang nagpraktis sa duwa nga soccer diin atol nga dag-om ug nagdugdog.
Kalit lang nga misiga ang yuta sa dihang naigo sa kilat ug nahay-ad ang maong mga batan-on nga nawad-an sa panimuot.
Makita sa gi-share nga hulagway sa social media nga ang gisul-ob nga sinina ni Alfeche ang nagisigisi. / DVG