Editoryal: Naminaw na gyud si Mayor Mike

Editoryal: Naminaw na gyud si Mayor Mike
File photo

Sa katapusan, nakahukom si Mayor Michael Rama nga sirhan na ang usa ka portion sa Cebu South Coastal Road (CSCR) nga gihimo nga u-turn slot sulod na sa daghang mga buwan apan nakadawat og grabeng mga pagsaway sa mga motorista.

Hayan nakaamgo si Rama nga tinuod nakamugna og kahuot sa trapiko ang mao nga u-turn slot nga nahimutang mga 500 metros gikan sa gitaganang slot ilawom sa taytayan sa utlanan sa mga dakbayan sa Sugbo ug Talisay.

Ang mga sakyanan magsumpot na og maayo sa usa ka lane sa mao nga bahin sa CSCR. Gikinahanglan pa sab nga mohunong sa mga sakyanan kon dunay motorista nga mogawas sa slot.

Lahi sa gitagana nga u-turn slot ilawom sa taytayan nga wa na kinahanglana pa nga mohunong ang ubang mga sakyanan nga nagsubay sa expressway unyag gawas niini sa main road. Expressway man na, kinahanglan nga lahoslahos ang tanang mga sakyanan.

Bisan gani ang mga nag-design sa Cebu-Cordova Link Expressway (CCLEX) niseguro nga ang mga sakyanan nga mosulod ug mogawas sa ika­tulo nga taytayan di makabalda sa dagan sa mga sakyanan nga manubay sa CSCR viaduct.

Gawas sa pagmugna og trapiko, naghatag usab ni og kakuyaw sa mga motorista nga ma­ak­sidente samtang nagtadlas sa dapit.

Ang seguruon na lang karon sa Cebu City Transportation Office (CCTO) mao nga wa nay mga nagmotorsiklo nga gahi og ulo nga mogamit sa gisirhan nga u-turn slot. Pabantayan unta ni og traffic enforcer aron magmatngon na sila kay duna gihapoy nangahas sa paggamit sa giwang sa slot.

Lain sab unta nga angay usbon sa CCTO, kana kon wa pa nila ni gipatuman, mao ang pagtugot sa four-wheeled nga mga sakyanan nga maka­subay sa motorcycle lane tungod kay sa kahinay nila nga modagan, ang mga nagmotorsiklo mapugos sa paggawas sa lain nga lane.

Kon tinuod man nga nagtugot ang liderato sa CCTO sa four-wheeled nga mga sakyanan nga makasubay sa mao nga lane unya nagdili sa mga nagmotorsiklo sa pagsubay sa laing lanes, kini diskriminasyon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph