NAKABSAN sa iyang kinabuhi ang drayber sa motorsiklo, samtang naangol ang iyang kapuyo human sila nibangga sa nag-parking nga Chariot tricycle sa alas 2:30 sa hapon, Sabado, Hunyo 15, 2025, sa Provincial Road sa Barangay Bolocboloc, Lungsod sa Barili.
Ang namatay giila nga si Alfred Ricaplaza Undang, 27 anyos, taga Barangay Japitan, Lungsod sa Barili.
Ang iyang kapuyo nga si Olivia Apostol Wolfe, 22 anyos, gidala sa tambalanan sa Siyudad sa Sugbo.
Si Police Senior Master Sergeant Gilbert Encabo, imbestigador sa Barili Police Station nga nahinabi sa Superbalita Cebu, niingon nga ang mga biktima gikan nga nangaligo sa falls sa Barangay Mantayupan, Barili kay birthday sa ilang higala.
Nagtagay sila uban sa ilang mga barkada atol sa ilang pagpangaligo.
Sa pagpauli na nila hinay ra ang dagan sa motorsiklo.
Pero pag-abot sa dulhogon, likuon nga dalan sa Barangay Bolocboloc, nawad-an sa kontrol sa manobela si Undang.
Nikawat siya sa pikas lane dayon’g bangga sa naka-parking nga Chariot tricycle.
Gumikan sa kakusog sa impact, nangalagpot sila si Undang ug ang kapuyo.
"Grabe man kaayong kadaot sa iyang ulo sir! Wala man siya mag-helmet, naugbok maong wa ma-survive," matod ni Encabo.
Ang kapuyo gidali sa pagdala sa tambalanan sa Dakbayan sa Sugbo.
Gibutyag ni Encabo nga ang tag-iya sa tricycle nga si Edgie Jurado Garcia nakigsabot sa kabanay sa biktima nga moabag sa galastuhan sa pagpahiluna sa biktima. / GPL