Namista ra unta; ulo gidakdaka’g bato, gidunggab

Namista ra unta; ulo gidakdaka’g bato, gidunggab
SunStar Local News GPX

Patay na nga napalgan ang usa ka 40 anyos nga lalaki nga adunay dinunggaban sa lawas ug dunay samad sa ulo nga gituohang gibundakan og bato sa Sityo Agpasan, Barangay Binaliw, bukirang bahin sa dakbayan sa Sugbo.

Ang biktima giila sa mga lumolupyo nga si Dante Cola, 40, taga Sitio Yellow Bells, Barangay Panoypoy, Lungsod sa Consolacion, Sugbo.

Matod ni Police Major Alvino Enguito, hepe sa Talamban Police Station, nga adunay mipahibawo kanila labot sa napalgan nga patayng lawas nga nagbuy-od sa gibanabana 200 metros gikan sa karsada sa maong lugar.

Pag-abot sa mga pulis sa maong dapit, wala nay kinabuhi ang biktima diin diha sa iyang kiliran sa may ulohan dapit ang dakong bato nga adunay lama sa dugo ug ang kutsilyo nga maoy gigamit sa krimen.

Walay makatug-an konkinsa ang naghimo sa krimen apan matod sa mga residente nga si Cola nabilanggo na kaniadto sa kasong pagpanglugos ug nakagawas sa bilanggoan niadtong Oktubre 2023.

Niadto siya sa maong lugar aron mamista sa iyang kabanay nga naa nagpuyo sa Binaliw ug gisugo sa iyang mga paryente nga mopalit og ilimnon, Dominggo sa gabii, Mayo 5, 2024, apan wala na kini makabalik.

Sa dihang ila na kining gipangita, dunay usa ka bata ang mipahibawo sa tanod sa Barangay Binaliw nga naay tawo nga nagbuy-od sa daplin sa karsada.

“Napriso ni siya sa kasong rape, nakagawas last October. Taga Barangay Panoypoy, Consolacion, Cebu man ni siya, boundary man ni sa Binaliw nya niadto siya didto kay naay pista nya nasubay namo nga niapil siya sa kali­ngawan.

“Naa siyay paryente nga iyang giadtoan,” matod ni Enguito.

Sa pagkutlo ning balita, aduna nay duha ka persons of interest ang kapulisan sa Talamban apan nagdumili lang una si Enguito sa pagbutyag sanglit nagpadayon pa ang ilang imbestigasyon. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph