Naposasan ang usa ka 40 anyos nga lalaki human nag-wild ug gibunalbunalan ang sakyanan sa iyang higala, alas 4:00 sa kaadlawon, Sabado, Enero 25, 2025, sa dalan M. Velez, Barangay Guadalupe sa dakbayan sa Sugbo.
Ang nabalhog sa Guadalupe Police Station giila nga si Dexter Santos Gabisan, 40, molupyo sa nahisgotang dapit.
Ang tag-iya sa sakyanan nga si Sonny Villa Toledo, 40, taga Barangay Poblacion, lungsod sa Compostela mao ra usab ang nidakop sa suspek.
Sa gihimong imbestigasyon sa Guadalupe Police Station nga nag-inom ang suspek uban sa biktima ug laing higala apan sa dihang nangahubog na, nagmaoy ang suspetsado ug gipangbunalbunalan ang sakyanan nga Toyota Wigo ni Toledo nga miresulta sa pagkabuak sa windshield sa luyo ug ang side mirror niini.
Nasuko matod pa ang suspetsado sa dihang nahisgutan nila ang karaan nila nga panagbangi nga tungod ani mikuha’g gahi nga butang si Gabisan ug gihapos sa sakyanan sa biktima.
Kasong Malicious Mischief ang atubangon nga kaso sa suspek bisan sa pagpangayo niini og pasaylo ngadto sa iyang higala. / AYB