Patay nang nadangat sa Cebu Provincial Hospital sa Balamban ang usa ka construction worker human gitigbas sa iyang kauban sa Sitio Bung-aw, Barangay Pondol, Balamban alas 11:50 sa gabii sa Biyernes, Hunyo 20, 2025.
Si Anecito Caputi Seras, 41, residente sa Sitio Cabitoonan, Barangay Pondol, nakaangkon og daghang samad dinunggaban sa iyang lawas.
Ang gitumbok nga responsable mao ang iyang kauban nga construction worker, si Rosallo Belgar Poleros, 44, nga nagpuyo usab sa Sityo Bung-aw.
Subay sa imbestigasyon sa Balamban Police Station, si Poleros ug Seras nag-inom sa balay sa suspek.
Gibutyag ni Poleros nga human nahurot ang ilang bino, iyang gipapauli si Seras. Apan pipila ka minuto ang milabay, nibalik si Seras nga nagdala og laing ilimnon uban sa usa ka higala.
Gibalibaran ni Poleros si Seras tungod kay aduna pa siyay trabaho pagka-ugma, apan namugos gyud si Seras.
Kini maoy hinungdan sa kasuko ni Poleros. Nagsumbagay ang duha hangtod nga nikuha si Poleros og sundang ug gitigbas si Seras sa makadaghang higayon. / GPL / AYB