Nakabsan sa iyang kinabuhi ang 53 anyos nga pintor sa dihang ang iyang gisakyan nga motorsiklo gikatahong wala mokontrolar sa drayber resulta sa disgrasya.
Ang insedente nahitabo niadtong alas 5:20 sa hapon, Miyerkules, Abril 23, 2025, sulod sa usa ka subdivision sa Barangay Bulacao, Dakbayan sa Talisay.
Ang namatay giila nga si Danny Bano, pintor, taga Sityo Ilang-Ilang, Barangay Lagtang, Siyudad sa Talisay.
Samtang naangol sila si Jose Batulan Jr., 20, pintor, drayber sa motorsiklo ug laing angkas nga si Jejomar Torrifiel, 26, construction worker, pulos taga Barangay Tanke, Siyudad sa Talisay.
Base sa impormasyon gikan sa imbestigador nga ang mga biktima mopauli na niadtong higayona ug mogawas na sa maong subdivision.
Sakay nang daan sila si Batulan ug Torrifiel, samtang si Bano nihangyo nga moangkas sab bisan kutob lang sa gate sa maong subdivision.
Una nang nibalibad si Batulan nga magpasakay pa og laing pasahero kay overloaded na sila, gani niabante na kini og padagan sa motorsiklo apan wala magdugay nihunong.
Gikatahong nakonsensiya si Batulan nga magbaktas lang si Bano hinungdan nga iya kining gipasakay.
Sa ilang pagdulhog nasarasay ang motor ug wala na makontrolar sa drayber ilabi na nga kurbadahon ang ilang gisubay nga kalsada hangtod nga nabangga sa gutter ug nalagpot ang mga sakay.
Si Bano kinsa maoy nakaangkon og grabeng kadaot sa iyang lawas ang namatay. / GPL
