Nagtingkagol sa prisuhan ang usa ka e-bike driver human giingong nangawat og mga puthaw o mga construction materials sa usa ka edipisyo nga nahimutang sa may Jai Alai, C. Padilla St., Barangay Mambaling , Dakbayan sa Sugbo niadtong Agusto 13,2025.
Nailhan ang dinakpan nga si alyas Junjun, 26, ug residente sa Sityo Mahayahay 2, Barangay Suba,Cebu City.
Basi sa imbestigasyon sa kapulisan sa Mambaling, nasayran nga alas 7:00 sa kabuntagon nisulod ang suspek sa usa ka construction site sa nahisgutang dapit ug giingong nanguha kini ug mga nagkalain-lain nga klase sa puthaw ug gisakay sa iyang e-bike.
Giingong ang foreman sa maong construction site ang nakasakop sa suspek ug gipadakop dayon kini sa kapulisan ug nakuha sa iyang posisyon ang I Bean nga 1.4 metros nga nagkantidad og P3,300 ug ang 3 ka metros nga Tubular 2x6 nga tag P1,200.
Nasayran nga ibaligya sa suspek ang mga butang nga kinuha kay wa na kini nakaabang sa e-bike nga gidrayban sulod sa tulo ka adlaw.
Kasamtangang gitanggong na sa Mambaling Police Station ang dinakpan ug gipaabot nga mag-atubang kini og kasong pagpangawat. / JDG