Way suwerte ang usa ka 36-anyos nga lalaki human mapusasan sa dihang naatlan nga nangawat og aircon sa usa ka punerarya sa dalan N. Bacalso sa Barangay Mambaling, Siyudad sa Sugbo, alas 3 sa hapon, Huwebes, Hunyo 12, 2025.
Ang suspek nga gibalhog sa Mambaling Police Station giila nga si John Mark Palermo Adante, 36, residente ra sab sa Barangay Mambaling.
Nakuha gikan kaniya ang usa ka 1 horse power (HP) window type nga air condition nga balor or P7 mil ug usa ka 1.5 HP window type air-condition nga nagkantidad og P15 mil.
Sa imbestigasyon sa Mambaling Police Station, nasayran nga naatlan sa manager sa St. Bernard Funeral
Homes ang suspek nga nikuha sa duha ka aircon nga tungod ani nanawag dayon siya og polis.
Kasong pagpangawat ang ipasaka batok sa suspek. / AYB