Usa ka 25 nga lalaki ang giingong nangawat og beer sa tindahan kay nakulangan sa tagay ang napusasan alas 12:50 sa udto sa Sabado Marso 15, 2025, sa Purok Talung, Sitio Mahayahay 2, Barangay Catarman, Lungsod sa Liloan.
Ang suspek giila nga si alyas Chris, ulitawo nga nagpuyo sa maong dapit.
Gireklamo siya sa tag-iya sa tindahan nga iyang silingan nga si alyas Willy, 68.
Si Police Chief Master Sgt. Arne Goc-ong, imbestigador sa Liloan Police Station, nagkanayon nga ang suspek uban sa iyang higala nagtagay sa wala pa nahitabo ang insidente.
Apan giingong gusto pang moinom si Chris pero wala na siyay kwarta, hinungdan nga iyang gikuha ang upat ka grande nga beer.
Pagsusi sa biktima pagkabuntag, nakulangan na ang kinahon nga beer og upat ka botelya sa grande.
Tungod niini, gisusi ni Willy ang CCTV footage og nakit-an ang suspek nga nagpurong nga nisulod sa ilang tugkaran sa tindahan bitbit ang beer mga alas 2:25 sa kaadlawon sa Sabado.
Nangayo og tabang ang biktima sa mga barangay tanod hinungdan nga nadakpan ang suspek og gi-turnover sa Liloan Police Station.
Matod ni Goc-ong, ang suspek naila usab nga kawatan sa ilang lugar.
Wala pa matino kon kinsa ang kauban niini sa panag-inom og beer human si Chris lang ang nakuha sa CCTV./GPL