Walay suwerte ang usa ka kawatan human nadakpan sa tag-iya sa balay nga iyang gikawatan sa mga mahalong relo, alas 6:30 sa buntag sa Lunes, Enero 27, 2025, sa dalan L. Tudtud, Barangay Mabolo, Dakbayan sa Sugbo.
Ang suspek nga nabalhog sa Mabolo Police Station giila nga si John Tobio Vidal, 31, taga Sitio Sto. Niño, Barangay Luz, Siyudad sa Sugbo.
Nakuha sa suspek ang mga mahalong relo nga naglangkob sa 1 ka Seiko Tuna color blue nga mobalor sa P30,000; 1 ka Seiko Samurai color blue mokantidad sa P100,000; 1 ka Seiko Turtle color blue nga dunay presyo nga P50,000; ug 1 ka Samsung Galaxy Watch color black nga mobalor sa P20,000, ang tanan mokabat sa P200,000.
Sa imbestigasyon sa Mabolo police, nasayran nga gisulod sa suspek ang balay ni alyas Ken, 33, usa ka medical representative ug gipanguha ang mga mahalong relo niini nga iyang collection.
Apan nabantayan niya ang paggawas sa suspek nga tungod niini, ila kining gidukod hangtod nga nadakpan.
Matod ni Police Major Romeo Caacoy Jr., hepe sa Mabolo Police Station nga nakuha hinuon pagbalik sa tag-iya ang mga relo.
Nadakpan na kaniadto si Vidal sa kaso sa ilegal nga drugas apan nakagawas usab human sa pipila ka buwan nga pagkabilanggo.
Human makagawas, sumala sa kapulisan, nalambigit na usab siya sa pagpangawat diha sa Barangay Mabolo ug Barrio Luz. /