Nadakpan ang habal-habal driver human giingong nangawat og soft drinks sa usa ka tindahan sa Purok 1, Sitio San Vicente, Barangay San Vicente, Lungsod sa Liloan, Sugbo sa alas 4:03 sa hapon sa Martes, Abril 8, 2025.
Si alyas Amir, 41 anyos, minyo nga taga Purok Limogmog, Sitio Curva, Brgy. San Vicente, Liloan gitanggong sa Liloan Police Station pinasikad sa reklamo sa tag-iya sa tindahan nga si alyas Amy, 52 anyos, minyo.
Narekober gikan sa suspek ang usa ka pack sa soft drinks nga mokantidad sa P132.
Ang biktima nibutyag sa kapulisan nga padulong siya sa iyang tindahan dihang nisugat kaniya ang iyang store helper ug nipahibalo nga wala mobayad ang habalhabal driver sa mga soft drinks nga iyang gikuha.
Ang suspek paspas kaayong nakasibat sakay sa iyang motorsiklo. Gi-report sa barangay ang maong insidente.
Atol sa pagresponde, nakit-an ang suspek nga nagparking sa terminal sa habal-habal.
Giimbitar nila kini ug gidala sa Liloan Police Station.
Nahibaw-an sa kapulisan nga napulo na kahigayon nga nangawat ang suspek sa tindahan sa biktima. (GPL)