KAGING na nga napalgan sa mga polis ang gidudahang kawatan nga napusilan sa guwardiya nga nagbantay sa piggery farm sa usa ka pribadong kompaniya nga nahimutang sa Sitio Tubod, Barangay Valladolid, Dakbayan sa Carcar.
Ang gikatahong pagpangawat nahitabo niadtong kaadlawon sa Miyerkules, Hunyo 25, 2025.
Ang namatay giila nga si Junriel Lawas Solon, alyas Onyot, hingkod, adunay kapuyo, taga Sitio Albor, Barangay Liburon, Dakbayan sa Carcar.
Usa ka kauban ang nasikop nianang alas 2:00 sa kaadlawon sa maong adlaw nga si alyas Delmar, 19, ulitawo, silingan sa namatay, samtang atol niining pagsuwat wala pa madakpi ang ikatulo nga kauban nga si Lyndon.
Si Delmar ang gihimong witness sa kapulisan nga nitumbok sa guwardiya nga nakapusil-patay sa iyang kauban nga si Junriel.
Si Police Staff Sgt. Chuck Dayuja, imbestigador sa Carcar Police Station nga nahinabi sa Superbalita Cebu niingon nga ang mga guwardiya sa maong piggery farm nanawag nila alas 8:40 sa buntag, Miyerkules nga nagpahibalo nga aduna silay nadakpan nga kawatan nga nanguha og wires.
Pag-abot sa mga polis, gi-turnover sa guwardiya si Delmar samtang nakaikyas ang iyang mga kauban.
Nakuha gikan sa dinakpan ang 450 meters nga pinutol nga wire nga mokabat sa P10,000.
Atol sa pag-turnover, diha ang tulo ka guwardiya nga sila si Geneboy Juntilla Comendador, 34; Adam Macaron, 23; ug Marlix Melgar Cabaluna, 34.
Matod sa kapulisan nga ang usa sa suspek nga si alyas Lydon ang nipahibalo sa ilang kabanay nga nahabilin sulod sa farm si Onyot kay napusilan sa guwardiya, hinungdan nga ang pamilya nangayo og panabang sa ilang mga opisyal sa barangay.
HUBO NGA LAWAS
Nakig-alayon ang management sa farm nga susihon ang area ilabi na nga lapad ang maong dapit ug sa alas 5:50 sa hapon, Miyerkules, Hunyo 25, napalgan ang usa ka hubo nga patay nga lawas sa kalibunan sulod sa farm. Giproseso sa Scene of the Crime Operatives ang lawas sa namatay nga adunay samad pinusilan sa bugan.
Giingong ang mga kawatan maghubo sa ilang sinina atol sa ilang pagpangawat aron nga dili dali nga mailhan.
Gipatawag ang tulo ka guwardiya ug si Macaron nga nakapasalba siya sa iyang armas sa dihang namatikdan ang pagpangawat sa mga suspek.
“Ingon ang guwardiya nga nakapasalba daw siya kausa tumong sa yuta. Wala siya magdahom nga naay naigo kay ngitngit unya kalibunan ang lugar,” saysay ni Police Staff Sgt.Dayuja.
Nasayran nga makadaghang higayon na nga gikawatan ang maong farm ug tungod sa kalapad sa area makalusot ang mga kawatan pinaagi sa pagkatkat sa koral. / GPL