Naposasan ang usa ka notadong kawatan human nanguha og cellular phone sa sulod sa usa ka mahalon nga imnanan nga nahimutang sa Waterfront Drive, Barangay Lahug sa siyudad sa Sugbo alas 3 sa kadlawon, Dominggo, Hulyo 6, 2025.
Ang gibalhog sa Mabolo Police Station giila nga si Raymarc Dacsil Roxas, 30, walay trabaho nga taga Mananga 2, Barangay Tabunok sa siyudad sa Talisay.
Sa imbestigasyon a Mabolo Police Station nga samtang nag-inom ang biktima nga si alyas Francis, 24, call center agent sa IT Park nga taga Sitio Maracas, Barangay Lahug, kalit lang nga nawagtang ang iyang cellphone nga mobalor sa P21,000.
Apan nabantayan na diay kini sa bouncer sa maong imnanan ug sa dihang padung na mogawas ang suspek gipugngan dayon kini ug gikuha ang cellphone sa biktima nga naa sa bulsa niini.
Human niini, gi-turnover sa 22 anyos nga bouncer ang suspek ngadto sa Mabolo Police Station alang sa pagpasaka og kasong pagpangawat.
Sigun sa usa sa mga imbestigador sa Mabolo Police Station nga notado nga kawatan ang maong suspek kay mao kini ang gitudlo nga responsable sa mga kawat sa Tabunok.
Giangkon ni Roxas ang salaud ug matud niya nga iyang ibaligya ang kinawat nga cellphone aron ipalit og pagkaon. / AYB