Naangol ang usa ka lalaki human dunggaba sa iyang silingang mag-uuma tungod sa pagpanimalos sa namatay nga binuhing iro niadtong Dominggo sa gabii, Agusto 23, 2026, sa Purok 7, Barangay La Esperanza, Lungsod sa Dagohoy, Bohol.
Giila ang biktima nga si Dante Quirina, ulitawo nga nagpuyo sa maong dapit. Samtang ang suspek mao ang iyang silingan nga si Romeo Ramada, 56 anyos, kinsa dali nga nadakpan human sa insidente.
Sumala ni Police Major Joseph LopeƱa, hepe sa Dagohoy Municipal Police Station, daan na nga dili maayo og relasyon ang duha tungod sa maong away. Gibutyag nga nasuko ang suspek kay gihiluan sa biktima ang iyang mga iro.
Nagsugod ang ilang away kay matag adto sa biktima sa iyang uma, masugatan niini ang siyam ka iro sa suspek. Tungod kay kanunayng kan-on sa mga iro ang itlog sa iyang mga manok, nag-andam ang biktima og pagkaon nga gisagulan og hilo ug gipakaon kini sa mga iro.
Sa dihang niagi sa ilang tungod sa balay ang biktima, gikomprontasi siya sa suspek nganong gihiluan niya ang iyang iro.
Pagka alas 7 sa gabii, niagi ang biktima sa balay sa suspek diin gikomprontasi siya ni Ramada. Nidepensa ang biktima ug giangkon nga gihiluan niya ang mga iro kay nahurot na ang itlog sa iyang mga manok.
Tungod sa kasuko ug ubos usab sa impluwensiya sa ilimnong makahubog, nikuha og kutsilyo si Ramada ug gidunggab ang biktima.
Dali nga gidala ang biktima sa tambalanan pinaagi sa ambulansya sa Dagohoy Emergency Response Team.
Samtang sa pagresponde sa kapulisan, ilang naabtan ang suspek sa balay sa Chief Tanod nga si Benito Ayag ug ila ning gidakop.
Giandam na sa Dagohoy Police Station ang kasong frustrated homicide batok sa suspek. / AYB