Nakugang ang 45-anyos nga guwardiya dihang gipusasan siya sa kapulisan niadtong Hulyo 28, 2025, sa Dakbayan sa Mandaue human nalutsan og warrant sa kasong pagpanghinol sa iyahang 19-anyos nga sister in-law.
Ang dinakpan nailhan sa alyas nga Miguel, lumad nga taga Leyte, minyo ug kasamtangang nag-abang sa Dakbayan sa Mandaue.
Nireklamo ang biktima human giingong gihinol ang pribadong parte sa lawas niadtong tuig 2021 sa balay niini atol sa ilang fiesta sa Lungsod sa Daanbantayan.
Gikataho nga ang suspek mag-ulian panagsa sa maong lungsod kay lumad ang iyang asawa sa maong dapit.
Sa pakighinabi ngadto kang Miguel, hugot kini nga nanghimakak nga wala siya makabuhat sa maong salaod ug dako ang iyang katingala nganong nalutsan siya og warrant.
Apan nisaysay siya nga sa mga miaging tuig, giingong nakadaog siya og dako nga kantidad tungod sa tari sa manok ug ang maong kuwarta iyang ginegosyo sa lending.
Tungod kay maayo ang dagan sa iyang pagpanarbaho, siya maoy madalidali og duol sa mga igsuon sa iyahang asawa kon magkinahanglan og kuwarta.
Apan giingo'ng ang biktima nga kamanghurang igsuon sa iyang asawa nangayo og kuwarta para palit og laptop nga gamiton sa eskuwela apan nabalibaran tungod kay gigamit sa pagpatukod sa ilang balay ang nahibiling kuwarta.
Nagduda ni Miguel nga naglagot ang biktima ug gisuyaan sab siya sa uban pang igsuon sa iyang asawa.
Gibalhog si Miguel sa Mandaue Police Station 1 ug mag-atubang siya og kasong nakalapas sa R.A 7610, Acts of Lasciviousness. / JDG