Nadakpan sa kapulisan sa Lungsod sa Bantayan ang 21-anyos nga tinun-an sa Bantayan National High School human nanghulga nga mamusil sa mga magtutudlo, tinun-an, ug staff sa eskwelahan alas 2:30 sa hapon sa Miyerkules, Agusto 19, 2026.
Ang nadakpan mao si alyas Joe, 21, taga Barangay Bantigue, Lungsod sa Bantayan, Isla sa Bantayan.
Nakadawat og tawag sa ilang hotline ang Bantayan Municipal Police Station gikan sa usa ka magtutudlo sa Bantayan National High School aron mangayo og tabang human nila nadawat ang maong hulga.
Sa pag-abot sa mga polis sa eskwelahan, nihimo dayon sila og imbestigasyon ug dinhi ilang nasayran nga dunay nagpadala og private message sa usa ka tinun-an gikan sa usa ka dummy account nga dunay pangalan nga Justin Rodriguez.
Ang mensahe nagkanayon nga, “Migo ako na pud ang mamusil diha sa Senior High School; diha sa Bantayan Island, ingna ang guard migo nga tarungon niya pagbantay hah, ingna pud imo mga kauban nga mga estudyante hahahaha,”
Sa maong mensahe, gihisgutan sab niya ang usa ka maestra sa Grade 11 nga iyang target nga pauwanan og bala ang sakyanan. Nagpadala sab siya og hulagway sa iyang 9mm nga armas nga dunay lima ka bala ug naghisgot nga aduna pa siyay AK-47 ug granada.
Duha ka saksi nga pulos sab tinun-an ang nitug-an sa mga polis nga ang maong dummy account gipanag-iya kini ni alyas Joe.
Nilusad dayon og hot pursuit operation ang Bantayan Municipal Police Station ug dali nga nadakpan ang suspek.
Nakakuha og ebidensya ang kapulisan sa Bantayan nga si Justin Rodriguez mao gyud si alyas Joe sanglit ni-chat ni sa iyang classmate nga naghimo siya og dummy account.
Kasong grave threats ug unjust vexation ang giandam nga kaso sa kapulisan batok sa maong tinun-an. / AYB
