Gipahamtangan sa Land Transportation Office- Central Visayas (LTO) og 90-day preventive suspension ang lisensya sa usa ka drayber nga naapil sa usa ka viral nga away sa dalan tali sa duha ka drayber og motor.
Ang maong suspension gipahamtang human sa usa ka video nga nikatap sa Facebook niadtong Agusto 18, 2026, nga nagpakita sa usa ka giingong pisikal nga pag-away sa duha ka drayber human nihunong ang ilang mga motor sa tunga sa dalan.
Gipakita usab sa maong footage ang daw usa ka hulga panahon sa ilang pag-away.
Tungod sa pagkatap sa video, nagpagawas ang LTO 7 og Show Cause Order (SCO) nga nagmando sa hingtungdan nga drayber nga mopakita sa Intelligence and Investigation Unit ubos sa Operations Division sa maong ahensya.
“The foregoing conduct, committed while operating and using a motor vehicle on a public road, raises serious questions regarding your temperament, judgment, self-control, and fitness to operate a motor vehicle,” mabasa sa usa ka bahin sa SCO.
Gidugang sa LTO 7 nga ang agresibo ug bayolento nga action sa kadalanan naghatag og peligro dili lang sa mga tawong naapil sa away kundi apil na sa ubang naggamit sa dalan ug sa publiko.
Gimanduan usab ang drayber nga mosumiter og verified explanation ug mga ebidensya sulod sa lima ka adlaw gikan sa pagdawat sa order.
Samtang nagpadayon ang imbestigasyon, gipasurender sa LTO 7 ang lisensya sa drayber ug gipahamtangan kini og preventive suspension.
“While the administrative case is being investigated, LTO 7 directed a surrender of the driver's license and imposed a preventive suspension on the driver’s license without prejudice to the final determination of administrative liability after due investigation and hearing,” matod sa LTO 7.
Ang aksyon sa LTO 7 administrative, ug ang final nga desisyon sa maong kaso magdepende sa sangputanan sa imbestigasyon ug proceedings.