Dili mominos og P490 ang kinatibuk-ang kantidad sa mahalong chocolate ug shampoo nga nakuha sa suspetsadong shoplifter sa mall apan nasakpan sa guwardiya, alas 5 sa hapon sa Martes, Disyembre 5, 2023, sa Brgy. Basak San Nicolas, siyudad sa Sugbo.
Ang suspek giila nga si Don Vincent Madera, 37, ulitawo, taga Brgy. Kinasang-an Pardo, dakbayan sa Sugbo. Nabawi gikan sa iyang posisyon ang usa ka chocolate ug shampoo.
Si Madera, nahinabi sa Superbalita Cebu, nipadayag nga dunay nihunghong niya nga pwede niya dalhon ang gikumpra nga di moagi sa cashier ug nagtuong libre kini. “Abi nako’g gihatag, naa may nihunghong nako..” matod ni Madera.
Gibutyag niini nga paborito niya ang chocolate kay makapagana kaniya og maayo kon makagamit sa ilegal nga drugas. Nabantayan sa mga polis nga maglahilahi ang rason sa suspek. Kasong theft ipasaka batok kaniya.