NAGTINGKAGOL sa bilanggoan sa Inayawan Police Station sa Cebu City Police Office ang usa ka 57-anyos nga lalaki nga construction worker sukad niadtong Marso 22, 2024 human pasakai og kasong robbery ug trespassing sa tag-iya sa balay nga iyang gisulod aron manguha og kahoy nga giingong iyang isugnod alang sa lutuong binignit.
Si Camilo Caballero, taga Barangay Buhisan, Cebu City nga nahinabi sa Superbalita Cebu, nabalaka kay hangtod sa pagsuwat ning taho, wa pa nasayod ang iyang pamilya sa nahitabo kaniya.
Matod ni Caballero nga mga alas 9 pasado sa buntag sa Marso 22, nisulod siya sa usa ka balay sa Barangay Bulacao, dakbayan sa Sugbo.
Matod niya nga sa iyang pagsulod duna nay usa ka tawo nga nanguha og kahoy sa sulod, busa nikuha sab siya og dos por dos ug dos por uno nga giingong iyang isugnod sa lutuon nila nga binignit alang sa Semana Santa.
Apan nasakpan siya sa tag-iya, kinsa nipadakop kaniya ug sa usa niya ka kauban nga wa niya mailhi, sa mga barangay tanod sa Pardo.
Gitugyan sila ngadto sa Inayawan Police Station ug gipasakaan og mga kaso. (GPL)