Gibalhog sa selda sa Mambaling Police Station ang usa ka lalaki nga nanagmal sa iyang kapuyo nga massage therapist alas 3:20 sa hapon, Huwebes, Hulyo 31, 2025, sa Sityo Crossing, Barangay Basak San Nicolas, dakbayan sa Sugbo.
Si LJ, 32, usa ka massage therapist nga taga Barangay Bonbon, lungsod sa Aloguinsan apan temporaryong nagpuyo sa nahisgutang lugar, nangayog pakitabang sa kapulisan human siya gisumbag sa iyang kapuyo nga istambay ug gipatid-patiran ang iyang tiil ug buko-buko.
Ang iyang kapuyo nga si Aldo, 35, nga nahinabi sa Superbalita Cebu, miangkon sa iyahang nahimong sayop.
Matud niya nga wa na siya maka agwanta sa ka maldita sa iyang kapuyo.
Kini human grabe ka yawyawan unya magsige pagselos.
“Naglalis mi kay udto na wala pami kaon unya gikalitan niyag hambat akong bukton, gipaak ko niya. Sa akong kalagot akong natukmod ug nadapatan pero wa nako sumbaga, napatiran ra kausa sa tiil,” sumala ni Aldo.
Apan bisan pa niini, nanghinaot siya nga dili na pasakaan ug kaso sa iyang kapuyo.
Nagmahay siya og nangayo ug pasaylo sa iyang kapuyo dungan sa pag-ingon: "I love you".
Kon dili siya pasayloon, hayan mag-atubang siya og kasong kalapasan sa Republic Act 9262 kon Physical Abuse. / GPL