Nangumot og dughan sa bayot, gidakop

Nabalhog sa Inayawan Police Station ang usa ka 35 anyos nga construction worker human pasanginli sa usa ka sakop sa LGBTQ+A nga nanghikap sa iyang dughan ug nipakita pa sa kinatawo niini sa Miyerkules sa kaadlawon, Marso 19, 2025, sa Sitio Bamboo Village, Barangay Basak Pardo, Dakbayan sa Sugbo.

Ang suspek giila lang sa alyas nga si Junjie, taga Sitio Bamboo Village.

Ang reklamante giila nga si alyas “Pretty”, 25, nga iya ra sab nga silingan.

Matod sa biktima nga samtang nagbaktas siya uban sa iyang higala nga usa usab ka bayot, iyang nakit-an ang suspek nga nag-inom kauban sa laing lalaki.

Tungod kay nasayod na siya sa batasan sa suspek kon mahubog, nilikay siya ug niagi sa laing agianan.

Apan gigukod siya sa suspek nga nipakita sa iyang kinatawo ug gikumot og kusog ang iyang dughan.

“Human niya makumot akong dughan, nagyawyaw pa siya kay wala kuno nako gitan-aw iyang kuan. Kaming duha sa akong friends dili lang once niya gihimo nako kay silingan man mi. Katong sauna sa sulod sa akong balay kilid lang man sa dalan inig pangape nako iyang isulod iyang kamot sa jalousie komuton niya akong totoy mao na akong gisiko. Katong pagka kaadlawon gikumot gyud niyag maayo,” matod ni alyas Pretty sa interview sa DyHP.

Nanawag dayon si Pretty sa taga Barangay aron ireklamo si Junjie.

Si Junjie sa iyang bahin, niangkon nga natintal siya sa miugdo nga dughan ni alyas Pretty sanglit dugay na sila nga buwag sa iyang kaipon ug gihidlaw na siya sa pakighilawas.

Giangkon ni Junjie nga tungod sa kahubog nga maoy hinungdan nga iya kadtong nabuhat.

Matod niya nga nag-inom sila og walo ka botelya nga bino sa iyang higala ug sa dihang iyang nakita ang biktima, iya kining gikomedyahan ug gikumot ang dughan apan wala matod pa siya magpakita sa iyang kinatawo. Giangkon usab niya nga magmaoy siya basta mahubog.

“Nakalitan ra guro na siya uy wala man gud nako kusga pagkumot, nangayo na kog pasaylo sa iyang igsuon ug papa kay ang iyang igsuon amigo man nako to kaayo,” matod ni Junjie. / AYB