NABALHOG sa Talamban Police Station ang usa ka 56-anyos nga lalaki human pasanginli sa 13-anyos nga babaye nga nanghikap sa iyang pribadong bahin sa lawas alas 9:50 sa gabii, Sabado, Hulyo 5, 2025, sa Barangay San Jose, Dakbayan sa Sugbo.
Ang suspek nga positibong gitudlo sa biktima mao si alyas Allan nga nagpuyo ra sab sa maong lugar.
Sa imbestigasyon sa Talamban Police Station, nasayran nga samtang nagbarog ang biktima sa gawas sa balay sa suspek, giduol siya niini ug gitiunan og hait nga kutsilyo.
Samtang nagtion sa kutsilyo, ang usang kamot sa suspek nikumot-kumot sab sa iyang dughan ug giapil pa ang iyang kinatawo nga supak sa iyang kabubut-on.
Human sa gihimo sa suspek, dali nga nisumbong ang biktima sa iyang inahan nga mao na sab ang nidakop niini.
Matod sa biktima nga gikan sila’ng nanglaag uban sa mga anak sa suspek apan sa ilang pagpamauli sa alas 9:50 sa gabii diha na nahitabo ang pagpangabuso kaniya.
Hugot nga gihimakak sa suspek ang krimen kay matod niya, igo ra niini nga gikuptan ang kamot sa biktima kay iya na’ng papaulion.
Gani, gikasab-an niya ang maong biktima tungod kay babaye’ng buhat ug bisan sa lawom na nga gabii naglaag-laag pa.
Giandam na ang kasong kalapasan sa Republic Act 7610 kon Acts of Lasciviousness nga isang-at sa Talamban Police Station batok sa suspek. / AYB