Samdan sa iyang wala nga bahin sa ilok ang 43 anyos, nga habal-habal drayber sa dihang gidunggab sa iyang gisingil sa utang niadtong alas 6:16 sa gabii, Martes, Oktubre 8, 2024.
Ang insedente nahitabo sa Purok Avocado, Sitio Ylaya, lungsod sa Liloan, Cebu.
Samtang misibat ang 20 anyos nga suspek nga gitago sa pangala’ng Roy, usa usab ka habal-habal drayber nga silingan sa biktima.
Si Police Chief Master Sgt. Arne Goc-ong, imbestigador sa Liloan Police Station mibutyag sa pakighinabi sa Superbalita Cebu nga nagkalalis ang biktima ug suspek.
Nasayran nga ang asawa sa suspek nakautang og P1,000 ngadto sa biktima nga gisigehan og panangil apan giingong gahi mobayad ang maong utangan.
Sulod sa makatulo ka higayon nga gipaningil sa biktima ang magtiayon nga nakautang niya, human nga iyang nasayran nga mihatag og pang down payment ang suspek sa ilang giutang nga motorsiklo.
“Nagtuo ang biktima nga duna nay kwarta kay naka-down gud sa bag-ong motor. Mao nga iyang gibalikbalikan sa pagpaningil,” matod pa ni PCMS Goc-ong.
Apan wala gihapon mobayad ang suspek ug asawa niini.
Nianang gabii gitawag ang biktima ni alyas Roy sa dihang gikamay niya ang biktima nga paduolon.
Gibati og ka-excited ang biktima sa pagtuo nga mabayran na siya sa maong utang hinungdan nga nagdalidali sa pagduol.
Apan nahitabo na hinuon ang mainitong panaglalis ug way bayad nga nakuha ang biktima.
Gamit ang kitchen si alyas Roy mihana og duslak ngadto sa biktima apan wa kini ma-intimano sa dihang giwakli ra sab sa asawa sa suspek ang kamot niini og didto miigo ang kutsilyo sa ilok sa biktima.
Gitabang ang biktima pinaagi sa pagdala sa Danao City District Hospital aron nga magpaalim sa iyang samad, samtang dali nga misibat ang suspek.
Si Goc-ong miingon nga nagpaabot sila sa suspek human mipahibalo ang kabanay nga mo-surrender.
Giandam na sab nila ang kasong frustrated murder batok sa suspek. / GPL