Gipahamtangan sa Maharlika Pilipinas Basketball League (MPBL) og lifetime ban ug P200,000 nga multa ang magduduwa sa GenSan Warriors nga si Michole Solera gumikan sa pagsukmag niini kang Jonas Tibayan sa Mindoro Tamaraws atol ilang duwa niadtong Lunes sa gabii, Agusto 11, 2025, sa Batangas City.
Samtang nagpadayon ang duwa, kalit lang giwalopan ni Sorela sa iyang tuong kumo ang apapangig ni Tibayan ug natumba kini dihadiha dayon.
Nabuak ang apapangig unya napiang ang abaga ug nagisi ang ngabil ni Tibayan, kinsa wala nakabantay sa pagsukmag ni Solera.
Human gitan-aw ang footage sa insidente, si MPBL commissioner Kenneth Duremdes nipagawas dayon og silot ngadto ni Solera.
"We condemn the incident, and the MPBL won't tolerate such actions. It compromises the player's safety and taints the league's image,” matod ni Duremdes nga napatik sa www.gmanews.tv.
"I've seen the worst (in basketball) and this is one of them. The league has the full authority to impose sanctions on this deplorable behavior."
Gawas sa silot nga gipahamtang sa MPBL, posible sab tangtangan og lisensya isip basketbolista si Solera sa Games and Amusements Board (GAB).
Gigamitan og stretcher si Tibayan aron madala sa labing duol nga ospital sa Batangas una kini gibalhin sa New Era Hospital sa Manila alang sa mas lawom nga medical examination.
Ang multa ni Solera nilabaw sa P100,000 nga gipahamtang ngadto ni Germy Mahinay, kanhi magduduwa sa Negros Muscovados, niadtong 2024.
Niadtong higayuna, gipahamtangan sab og lifetime ban si Mahinay gumikan sa pagsukmag niini kang Joey Barcuma sa Zamboanga Family's Brand Sardines. / ESL