Tulisan nga wala kadagan ang nasikop sa mga tawo dihang nanulis sa naglakaw nga babaye gamit ang barbeque stick sa may Magallanes St., Barangay Ermita, Dakbayan sa Sugbo, Martes, Mayo 6, 2025.
Ang suspek nailhan nga si John Ric Castro, 18, ulitawo, walay trabaho ug lumolupyo sa P. Burgos St., Barangay Sto. Niño ning siyudad.
Ang biktima mao si alyas “Joy”, 23, lumad nga taga Lungsod sa Barili.
Subay sa imbestigasyon sa Carbon Police Station mga alas 5:00 pasado sa hapon samtang naglakaw ang biktima sa dalan Magallanes, dunay niduol kaniya nga tulo ka mga lalaki nga dili niya kaila.
Usa sa tulo ka lalaki mao si John nga nanion og “barbeque stick” sa tiyan sa biktima ug nideklarar og tulis ug gipangayo ang kwentas, ariyos, relo, cellphone, ug kuwarta.
Wala gihatag sa biktima ang iyang mga butang apan nisinggit og panabang sa mga tawo nga naa sa duol.
Dihang nakabantay na ang mga tambay, nisibat ang laing duha ka kauban apan ang usa padayong nihulbot sa kwentas nga gisul-ob sa biktima kantidad og P25,000.
Pinaagi sa citizen’s arrest nadakpan ang usa sa mga tulisan ug na-recover ang nakuha nga kwentas.
Gidala ang suspek sa Carbon Police Station ug gitakdang pasakaan og kasong pagpanulis. / JDG