NADAKPAN na sa Inayawan police station uban sa Dalaguete Police Station ang responsabli sa pagdunggab sa habalhabal driver niadtong Sabado sa kaadlawon, Pebrero 8, 2025 sa dalan Natalio Bacalso, Barangay Kinasang-an sa dakbayan sa Sugbo nga nakuhaan og video sa mga motorista.
Ang nadakpan giila nga si Jack Daguplo Villacorte, 35, taga Villa Cacao, Barangay Kinasang-an, Dakbayan sa Sugbo apan lumad nga taga Barangay Bogo, Cagayan de Oro City.
Siya ang nakita sa video nga nidunggab sa makadaghang higayon kang Alfred Casurra Pareja, 33, nga taga Barangay Mambaling, nga nakangkon og daghang samad sa lawas.
Ang Inayawan police station nisusi sa nag-viral nga video sa social media ug nailhan pinaagi sa abag sa publiko ang suspetsado.
Gilusad ang manhunt operation ug pagka hapon dunay nakahatag og impormasyon nga si Villacorta nisibat didto sa iyang iyaan sa Barangay Manangal, Lungsod sa Dalaguete, Cebu .
Wa maglangan ang kapulisan sa Inayawan niadto sa maong lungsod ug nakig-alayon sa kapulisan sa Dalaguete.
Alas 3:20 sa kaadlawon, Domingo, Pebrero 9, 2025 malampuson nga nadakpan ang suspek ug gidala sa Inayawan police station.
Sa pakighinabi sa DyHP kang Villacorta iyang gihimakak nga siya ang nanguna sa biktima sukwahi sa unang nigawas sa balita.
Matod ni Villacorta nga siya ang giunhan sa biktima pinaagi sa pagbunal kaniya sa walay igong hinungdan gamit ang tire wrench.
Iyang gibutyag nga niagi siya sa tungod ni Pareja apan gibugal-bugalan siya ug dayong bunal niya.
Dinhi na nahitabo ang sinumbagay sa duha ug gisuwayan matod pa siya sa pagdunggab sa biktima gamit ang screw driver apan iya kining nailog.
“Kanang iyang gipangbunal nako ako nang gipangdawat sir, gibunalan ko niyag wrench nga puthaw igo akung kamot akung ulo ug lawas, iyaha man sad to gikan ang screw driver dayon iya man ko gibunalan mao to ako siyang gidumog nya natumba man siya mao to ako siyang giyak-an,” matod ni Villacorta.
Tinguha niya nga magpa-medical aron pagmatuod nga wala siya mamakak ug duna siyay bun-og sa lawas.
Iyang gipasabot nga sayo siya nga nilakaw niadtong Sabado sa kaadlawon kay moadto sa Carbon aron mamalit alang sa iyang paninda nga pagkaon sa iyang carenderia duol sa Carbon police station. / AYB