Napagan sa pagpusil, patay

Local News
Local News(File photo)

Batan-ong lalaki namatay human napagan sa pagpa­musil sa alas 6 sa gabii sa Miyerkules, Nobiyembre 1, sa sityo Ylaya, Brgy. Bolinawan, dakbayan sa Carcar.

Ang biktima giila nga si Sean Ybañez Gantuangco, 23, graduwado sa kursong Cri­minology, minyo, taga Proper, Brgy. Valladolid, kinsa patay nang niabot sa tambalanan.

Naangol si Josephus Divinagracia, 39, nga mao untay target sa pagpusil sa suspek nga si Marcialo “Boy” Baquiller, 60, minyo, nagpuyo sa nahisgutang lugar.

Si Baquiller ni-surrender sa kapulisan alas 4 sa kaadlawon sa Huwebes, Nobiyembre 2.

Si Police Lt. Col. Pedy Noval, hepe sa Carcar City Police Station nga nahinabi sa Superbalita Cebu sa Huwebes, nagkanayon nga si Divinagracia gipaangkas ni Gantuangco human kini naagian samtang naglakaw sa karsada.

Wa nasayod si Gantuangco nga sila si Divinagracia ug Baquiller nagkaaway na human sumbaga sa suspek.

Ang biktima niuli sa ilang balay kay nagkuha og cellphone aron kuhaan og picture ang iyang motor nga natumba.

Si Divinagracia pag-umang­kon ni Baquiler.

Samtang nagsubay sa karsada, nag-atang na diay si Baquiler busa dihang namusil, nakalihay si Divinagracia, kinsa naigo sa wala nga bukton.

Ang bala niigo sa ulo ni Gantuangco.

“Nakainom man ning suspek. Nagsugat sila, nahitabo ang komusyon. Nasumbagan niya ang pag-umangkon,” asoy ni Noval sa hitabo sa wa pa ang pagpamusil.

Mga kasong homicide ug frustrated homicide ang ipa­saka batok sa suspek.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph