Patay ang usa ka lalaki nga nagmotorsiklo dihang nabangga ug napasok sa ilawom sa sports utility vehicle (SUV) sa aksidente sa transcentral highway (VH) sa Sitio Kamanggahan, Barangay Cansomoroy, lungsod sa Balamban, alas 11 sa buntag, Dominggo, Oktubre 13, 2024.
Sa pakisusi sa Superbalita Cebu, nasayan nga ang biktima mao si Mico Dionson, 23, ulitawo, nagtrabaho isip sales ambassador sa dakong mall sa dakbayan sa Mandaue, ug taga Purok Tambis, Barangay Casuntingan, Mandaue.
Samtang, ang aksidenting nakaligis sa biktima mao ang SUV nga Toyota Fortuner nga gimaneho ni Junjun Quirabo, 37, ulitawo apan may ka puyo, sales agent sa usa ka gas company, ug taga Sitio Nazareth, Barangay Maguikay, Mandaue.
Matod pa, ang biktima kusog nga nagpadagan sa iyang gimaniho nga motorsiklo nga gikan sa sentro sa Balamban ug padulong mopauli sa Mandaue.
Apan pag-abot sa naasoy nga dapit nga kurbadahon nga bahin, gikataho nga nawad-an kini sa balanse ug natumba ngadto sa pikas lane gisubayan sa gikasugat nga SUV hinungdan nga napaslak kini sa ilawom ug ligsan.
Ang biktima gitabang sa mga responder gikan sa Balamban ug gidala sa Balamban District Hospital apan gidekarar sa attending physician nga dead on arrival (DOA).
Ang drayber sa maong SUV wa makustodiya og dugay sa kapulisan sa Balamban sa dihang ang pamilya sa biktima ang nakigsabot sa drayber ug nakab-ot ang amicable settlement.
Ang TCH, nagdugtong sa dakbayan sa Sugbo ngadto sa Balamban sa kasadpan sa isla sa lalawigan sa Sugbo agi sa dakong kabukiran, naila nga ‘killer highway’ tungod sa kadaghan sa aksidente nga nahitabo ug kinabuhi nga nakalas nga nakapaalarma sa awtoridad.
Ang Land Transportation Office (LTO) uban sa pag-abag sa Mobile Patrol Group (MPG) nihimo na og lakang sa pagkontrolar sa dagan sa mga sakyanan sa TCH, lakip sa pagbutang og mga pasidaan sa dan.
Ang kapulisan sa Balamban ug dakbayan sa Sugbo kanunay nagpasidaan nga magmatngon sa pag-agi sa TCH. /