Patay na nga nadangat sa Vicente Mendiola Center for Health Infirmary ang 65-anyos nga motorista human nadumbolan ug napasok sa ilawom sa dump truck sa National Highway, Barangay South Poblacion, Dakbayan sa Naga, alas 12:40 sa hapon, Biyernes, Agusto 7, 2026.
Ang biktima giila nga si Daniel Segura Robiato, 65, residente sa Purok Atis, Barangay Inoburan sa maong dakbayan nga nagmaneho sa iyang Honda Click nga motorsiklo.
Sa inisyal nga imbestigasyon sa Naga City Police Station, nasayran nga nagsubay sa susamang direksyon paingon sa South ang motorsiklo ug ang dump truck (GAL 7565) nga gimaneho ni Pablo Caayo Catipay, 53, taga West Poblacion, Naga City.
Ang motorsiklo ni Robiato nag-una nga nagsubay sa outer lane habig sa karsada samtang ang dump truck nagsunod sa inner lane.
Pag-abot sa maong dapit, nabantayan ni Robiato nga adunay nakabutang nga early warning device sa iyang agianan, hinungdan nga nibalhin kini sa inner lane.
Apan ang nagsunod nga dump truck nga kusog nga nagdagan wala na maka-brake ug nakadumbol sa luyo sa motorsiklo.
Tungod sa kakusog sa impak, napasok ang motorsiklo ug ang biktima sa ilawom sa truck ug nadaro kini og pipila ka metros nga niresulta sa grabe nga kadaot sa iyang lawas ug ulo.
Dali nga gidala ang biktima sa tambalanan apan gideklarar nga dead on arrival ni Dr. Kathlein Alcala sa Infirmary Hospital.
Gikustodiya na sa Naga City Police Station ang drayber sa dump truck ug giandam na ang kasong Reckless Imprudence Resulting in Homicide batok kaniya. / AYB
