NIMANDO ang National Police Commission (Napolcom) og usa ka motu proprio nga imbestigasyon sa giingong kalambigitan sa pipila ka aktibo nga personnel sa kapulisan sa pagkawala sa kapin sa 100 ka mga sugarol sa sabong o mga sabungero.
Sa usa ka pamahayag, si Napolcom Vice Chairperson ug Executive Officer Attorney Rafael Calinisan niingon nga iyang gimanduan ang Inspection, Monitoring and Investigation Service (IMIS) nga susihon ang maong butang, hilabi na ang giingong panagkunsabo sa mga polis ug sibilyan nga mga kriminal sa pagpatay sa mga biktima ug paglabay sa ilang mga lawas sa Taal Lake sa Batangas.
Gipasaligan ni Calinisan ang publiko nga dili siya magduhaduha sa pagtangtang sa serbisyo sa bisan kinsang personnel sa kapulisan nga nalambigit sa maong krimen.
Giawhag usab niya ang pagpasaka og pormal nga reklamo sa Napolcom aron mapadali ang resolusyon sa kaso, sa koordinasyon sa Department of Justice (DOJ) ug sa Philippine National Police–Criminal Investigation and Detection Group (PNP-CIDG).
Sa usa ka interbyu sa telebisyon, usa sa mga akusado sa kaso sa nawala nga mga sabungero niingon nga andam siyang isulti ang tanan niyang nahibal-an bahin sa kaso.
Giangkon niya ang kalambigitan sa pagdagit sa mga biktima pipila ka mga tuig na ang nakalabay.
Sa sinugdanan, iyang gibutyag nga dili lang 34 ka mga sabungero ang gipatay ug gilabay sa Taal Lake sa Batangas.
Ang akusado nga nahimong whistleblower nilambigit sab sa pipila ka mga opisyal sa kapulisan, usa ka security guard gikan sa usa ka sabungan sa Manila, ug usa ka personalidad sa showbiz isip giingong mga utok luyo sa krimen.
Matod niya nga ang anaa sa luyo niining mga pagpatay adunay kuwarta aron malikayan ang prosekusyon.
Niingon ang whistleblower nga gipili niya nga mosulti tungod sa mga hulga nga iyang nadawat human gihatagan og temporaryong kagawasan sa korte. / TPM / SunStar Philippines