Sa ikaduhang sunodsunod nga tuig, napili si Brgy. Ginebra Gin Kings big man Christian Standhardinger isip top pick sa players drafting alang sa 2024 Philippine Basketball Association (PBA) All-Star Game nga ipahigayon sa Bacolod City sa sunod buwan.
Ang usa sa duha ka napiling team captains nga mao ang laing big man sa Ginebra nga si Japeth Aguilar nitudlo kang Standhardinger atol sa official All-Star drafting niadtong Lunes sa gabii, Pebrero 26, 2024, sa TV 5 Media Center.
Sa iyang turno, ang laing team captain nga si Magnolia Hotshots pointguard Marc Barroca nipili sa 7-time MVP nga si San Miguel Beermen big man June Mar Fajardo.
Isip team captains, nagpuli-puli pagpili og mga magduduwa sila si Aguilar ug Barroca gikan sa players pool hangtod nga naporma nila ang ilang tagsa-tagsa ka puwersa nga magkombati alang sa All-Star Game.
Gawas kang Standhardinger, ang ubang gipangpili ni Aguilar mao sila si Scottie Thompson, Jamie Malonzo, Maverick Ahanmisi, ug Stanley Pringle sa Ginebra, Paul Lee sa Magnolia Hotshots, Calvin Oftana sa TNT Tropang Giga, Chris Newsome sa Meralco Bolts, Arvin Tolentino sa NorthPort Batang Piers, Tyler Tio sa Phoenix Fuel Masters, ug sila si Don Trollano, Marcio Lassiter ug Terrence Romeo sa San Miguel Beermen.
Samtang ang ubang gipangpili ni Barroca mao sila si Jio Jalalon, Ian Sangalang, ug Calvin Abueva sa Magnolia, Jason Perkins, rookie Ricci Rivero sa Phoenix, CJ Perez sa San Miguel, Robert Bolick sa NLEX Road Warriors, James Yap sa Blackwater Bossing, Jayson Castro sa TNT, Gabe Norwood sa Rain or Shine Elasto Painters, Cliff Hodge sa Meralco, Juami Tiongson sa Terrafirma Dyip, ug Nards Pinto sa Ginebra.
Si Ginebra coach Tim Cone maoy mogiya sa Team Aguilar samtang si San Miguel coach Jorge Gallent sa Team Barroca. / ESL