Tungod sa kahoy nga iyang isugnod unta alang sa pagluto og binignit sa miaging Semana Santa, usa ka construction worker nabilanggo na hinuon, alas 9:40 sa buntag, Marso 22, 2024.
Siya nasakpan nga nisulod sa usa ka balay sa Brgy. Bulacao, dakbayan sa Sugbo kay abli ang gate ug giingong walay tawo.
Si Camilo Caballero, 57, taga Brgy. Buhisan, siyudad sa Sugbo, gipasakaan og kaso nga robbery ug trespassing uban sa usa ka Michael Cabulao, 31, dunay kapuyo, taga Lower San Roque, Brgy. Bulacao, dakbayan sa Sugbo.
Si Caballero nga nahinabi sa Superbalita Cebu, niangkon sa iyang sayop nga nabuhat ug nangayo unta siya og pasaylo sa tag-iya sa panimalay nga si Mary Ann Pearl Alfero, 38, negusyante.
Apan gipasakaan gyud sila og kaso sa tag-iya sa balay.
Matod ni Caballero, naglakaw siya sa karsada samtang namunit og kahoy padulong sa pagduaw sa namatay niyang ig-agaw sa dalan Cabreros.
Samtang naglakaw, naagi siya sa usa ka dakong panimalay nga walay tawo, diin abli ang gate hinungdan nga siya nisulod.
Tinguha niya nga manguha’g kahoy aron masugnod sa iyaha nga lutoong binignit. Sa pagsulod niya, naay usa ka lalaki nga nailhan niyang si Michael, dili sila kaila apan nagtagdanay.
Miyango niya siya Michael, iyang giingnan nga manguha siya og kahoy.
Gibitbit niya ang usa ka dos por dos nga kahoy nga mga tunga sa dupa ang gitas-on.
Gihapit sab niya sa pagbitbit ang uno por 4 nga kahoy.
Akto sab nga molakaw na unta siya, naabtan siya sa mga tanod ug nadakpan.
Gipasabot niini nga naabtan sila sa akto.
Matod ni Caballero,siya nagmahay sa nahitabo ug wala magdahom nga tungod lang sa dos-por-dos nga kahoy nabalhog siya sa bilanggoan ug wala pa nakaluto og binignit atol sa Biyernes Santo. / GPL