Ulitawo gipasanginlang nanghikap sa kinatawo sa usa ka 22-anyos nga PWD gidakop alas 10:15 sa gabii, Martes, Hulyo 15, 2025, sa Labsalex, Salvador Ext., Barangay Labangon, Dakbayan sa Sugbo.
Ang biktima si alyas “Maja”, 22, dalaga PWD nagpuyo sa nahisgutang lugar.
Ang nadakpan giilang si alyas Esyot, 36, ulitawo, silingan sa biktima, gitanggong sa Labangon Police Station samtang giandam ang kasong kalapasan sa Acts of Lasciviousness.
Ang biktima naghilak nga nisugilon sa iyang inahan nga naglakaw siya dihang nasugatan ang suspek.
Gikalitan sa paghikap ang iyang kinatawo ug tungod sa kahadlok nagdali siya sa pagpauli aron mosumbong.
Ang inahan uban sa biktima og mga barangay tanod daling nisusi sa dapit ug nadakpan ang suspek ug gi-turn over sa Labangon Police Station.
Si Esyot nga nahinabi sa Sunstar Superbalita Cebu hugtanong nanghimakak sa pasangil.
Matod niya nga nagsugat sila sa gamay nga dalan ug aksidenting nagkasaghid ilang mga abaga hinungdan nga ang iyang kamot napunta sa bugan sa biktima.
Gipadayag niini nga wala siyay intensyon nga hilabtan ang PWD nga silingan.
Nanghinaot ang suspek nga mapasaylo sa ginikanan sa biktima. / GPL