NABALHOG sa custodial facility sa Guadalupe Police Station ang 37 anyos nga lalaki human gipadakop sa iyang kapuyo nga iyang gikulata kay nasakpang adunay laing babaye’ng gika-chat hinungdan sa karambola.
Nahitabo ang insidente niadtong Dominggo, Marso 23, 2025, sa Sitio Kalubihan, Barangay Guadalupe, Cebu City.
Ang reklamante nga iya ra usab nga kapuyo mao si alyas Pamela, 38, adunay 5 ka mga anak.
Nireklamo si Pamela ngadto sa polis nga gikulata siya sa iyang kapuyo sa dihang iyang nasakpan nga nag-chat sa babaye.
Sa interview sa DYHP ngadto ni Lover Boy, iyang gisaysay nga nabilanggo na siya sa Bureau of Jail Management and Penology sa Dakbayan sa Bogo sulod sa 11 ka tuig sa kaso sa pagpangawat ug ilegal nga drugas ug niadtong Oktubre 30, 2024, siya nakagawas.
Matod niya nga samtang naa siya sa sulod sa bilanggoan natingala siya nga nahunong na ang pagduaw ni Pamela niadtong 2016 nga iyang gidudahan nga aduna na kini gikarelasyon.
Sa iyang paglaya, natingala na lang siya nga duna nay laing gipuli si Pamela ug nakaanak pa og laing duha.
Iyang gibutyag nga bisan naa siya sa sulod sa bilanggoan sa Dakbayan sa Bogo, nagdiskarte siya pinaagi sa pagpamaligya og sigarilyo ug manglabada sa sapot sa laing piniriso aron ipadala ang kwarta sa iyang kaipon nga si Lyn alang sa kunsomo sa iyang tulo ka anak.
Iyang gidawat ang iyang kaipon bisan duna kini anak sa laing laki tungod kay matod pa nahigugma pa gihapon siya ni Pamela.
“Nagtuo na siya nga babaye na ang mag-chat nako, mao nang masuko na siya basta mogamit ko'g cellphone kay bisan kinsa na lay selosan ana niya. Kon siya gani naay mo-chat niya nga laki wala rako pero kon ako naay mo-chat iyaha nang padak-on, iya na dayon kong biklon,” matod ni Lover Boy sa interview sa DyHP. / AYB