Moduwa pagbalik ang 7-footer nga si Greg Slaughter sa Zamboanga Valientes alang sa umaabot nga Asia Pacific Basketball Tournament sa Melbourne, Australia.
Mao kini ang tataw nga hinungdan nga wala gihapon kini nakapirma og kontrata sa Titan Ultra Giant Risers, ang labing bag-ong team sa Philippine Basketball Association (PBA).
Si Slaughter ug tanang mga sakop sa Valientes nasuta nga niabot na sa Land Down Under niadtng Martes, Marso 31, 2026, alang sa tulo ka mga adlaw nga torneyo, nga sugdan karong Biyernes, Abril 3, sa Waverley Basketball Stadium.
Ang Valientes maoy ikaduhang team nga magrepresentar sa Pilipinas alang sa 12-club pocket tournament human sa We Are CSAS Pilipinas, nga ningkombati sa Division 1.
Ang Valientes moduwa sa Premiere Division nga salmutan sab sa NBL-Australia teams lakip na niini ang BSBL Guardians (Brisbane), BTO MBL All Stars ug Black Rhinos.
Sa interbyu sa Spin.ph, gipasabot sa tag-iya sa Valientes nga si Junnie Navarro nga ilang nakuha pagbalik ang serbisyo ni Slaughter gumikan kay wala pa man kini kontrata sa Giant Risers, nga interesado gyud unta kaayong mokuha sa produkto sa University of the Visayas (UV) Green Lancers. / ESL